Task Force Detainees of the Philippines

Photo by J. Javier

"Katotohanan ang sa atin ay magpapalaya
Kaya't panghawakan, isapuso't isadiwa
Ito ang sandigan ng hustisya't kapayapaan
Na ating pinapangarap at inaasam."
- BOBET MENDOZA

Ito ang naging panawagan ng mga kabataang dumalo sa katatapos lamang na Human Rights Training and Theater Workshop na ginanap nitong Abril 19-23, 2010 sa Pook ni Maria Makiling, Los Banos, Laguna. Bahagi ito ng proyekto ng Youth for Rights (Y4R) na tinatawag ADIK KA (Arte, Drowing, Indak, Kanta ng Kabataang Artista) para sa Karapatang Pantao.

Dinaluhan ang nasabing pagsasanay ng mga dalawampu't-pitong kabataan mula sa anim na pamantasan gaya ng Adamson University, De La Salle University, Marikina Polytechnic College, Pamantasan ng Lungsod ng Maynila, St. Joseph's College at University of Makati. May ilang kabataan din mula sa Samahan ng mga Anak ng Desaparesidos na kasama sa training at workshop.

Isa sa mga layunin ng pagsasanay ay upang maangkupan ng sapat na kaalaman ang mga kabataang nagsidalo hingil sa usapin ng Karapatang Pantao at ang mga prinsipyo't konsepto sa likod nito. Pangalawa ay upang madagdagan pa ang kanilang kasanayan sa teatro na kanilang magiging kasangkapan sa pagpapalaganap ng kahulugan karapatang pantao sa buhay ng mga komunidad na pagdarausan ng kanilang mga palabas. Binigyan sila ng kaalaman sa usapin ng pagmimina sa Pilipinas dahil ito ang magiging tema ng kanilang lilikhaing dula.

Napagkaisahan na ipalabas nila ang kanilang pagtatanghal sa komunidad ng Kasibu sa Nueva Viscaya na apektado ng malawakang pagmimina ng OceanaGold Phils.Inc., isang Australian Mining Co.

Naging tagumpay ang nasabing pagsasanay sa tulong ng National Commission on Culture and Arts na nagpadala ng mga tagapagsanay sa teatro at sining sa katauhan nila Dr. Glecy Atienza at Prof. Robert Mendoza. Sa pagtatapos ng training at workshop, nagtakda ang mga kalahok ng mga rehearsal upang maayos at mapaganda ang kanilang gagawing pagtatangahal sa Mayo 30.

Share This Article