| Kung Paano Paslangin ang Pagkabagot sa Loob ng Karsel |
| Volume 21 Number 4 |
| Friday, 15 January 2010 10:31 |
|
1. Ipunin ang agiw sa kisameng kabelya at isupot sa plastic ng rasyong patola 2. Is-isin ang lagkit sa malamig na pader at kulapulan ng irap ang nakahubong poster. 3. Dangkalin ang sahig at kunin ang distansya ng langit at impyernong tinamasa sa lupa. 4. Aralin ang kultura ng ipis, langgam at daga ihambing sa buhay mong sa bilibid nakalungga 5. Magsubo ng sigarilyo pero huwag sindihan hayaang maluray sa ngitngit ng bagang 6. Magbunot ng balbas at idikit sa salamin tarahan ang araw nang kawalang-kapiling. 7. Sagutan ang crossword, Su Doku’t blind item; makipagsagutan sa bantay, kalampagin ang karsel. 8. Taluntunin ang radio at makinig sa drama, lumiham kay Tiya Dely at magpadala ng tula. 9. Maghinuko, maghiso, maligo at maghinuli; masdan ang kuko, ngipin, katawan at hinugasang budhi. 10. Humiga nang patihaya saka dumekwatro (Ganito ang sunod na gawin, pero wag magpabuko) 11. Hintaying magka-agiw ang ipis sa kisame, sipingan ang langgam sa dingding; makipagniig sa daga sa sahig, sigarilyo’y muling sipsipin 12. Kapain ang kinis ng pisngi, ikumot ang bali-balita; wag nang buhayin ang radyo, palayain ang diwa. (*inilathalang mayroong pahintulot mula sa may akda. Si Axel Pinpin ay kabilang sa tinaguriang "Tagaytay 5" - kasama nina Riel Custodio, Aristedes Sarmiento, Enrico Ybanez at Michael Masayes - na dinukot ng mga pulis at miyembro ng Naval Intelligence Security Forces (NISF) noong Abril 28, 2006 sa Tagaytay City. Inaakusahan silang mga miyembro ng Communist Party of the Philippines - New People's Army (CPP-NPA). Hanggang ngayon, nakapiit sa Camp Vicente Lim ng Philippine National Police (PNP) sa Calamba City, Laguna. Si Pinpin ay naging fellow para sa tula ng UP National Writers Workshop noong 1999. Kabilang ang kanyang akda na "Unang Komunyon" sa aklat na "Mga Kuwentong Paspasan" na inilathala ng Milflores Publishing noong 2007) Share This Article 
       |
| Last Updated on Friday, 15 January 2010 11:34 |
Petition
Sign Now!
Click to visit FB Page